Koi bhi lekhak kuch bhi likhne se pahle yehi sochta hai ki kaha se shuruaat karu, lekin main yeh soch raha hu ki kahan se shuruaat naa karu. Director Dr. Vikas Kapoor ne khoobsurat patkatha ko kirdaaro me utaarkar apne behatreen nirdeshan ke bal par ek aisa chalchitra prastut kiya ki, mere shabd unke pratibha ke sath nyay nhi kar paane ke dar se katra rahe hai. Fir bhi ek choti si koshish….
                                              “jee, jaise aap ki marzi…!!!”, ek aisa naatak jo sirf samaaj ko yeh nhi sikhaata ki naari ke sath kaisa vyavahaar kiya jaaye, kyunki yeh kaam toh bahut log karte the, kar rahe hai aur karte rahenge. Lekin fir bhi halaat nhi badal rahe hai, kyunki agar aap vaastav mein kuch badlna chaahte hai toh ek nayi soch logo tak pahunchaane padegi, kyunki badlte waqt ke sath badlaav jaruri hai. Kisi bhi chauraahe pe khada thele waala, har roz apne ek hi tarike se graahak ko apni aur khinchna chaahta hai aur fir bhi who safal nhin ho paata, toh use sirf ek cheeze ki jarurat hai aur who hai badlaav ki.
                                               Yeh ek nayi soch bhara naatak hai jisme yeh bataane ki koshish ki hai ki naari ke saath accha vyavahaar karne se hi kuch nhi badlega, badlna toh khud naari ko hi padega, kyunki naari ki asli kamjori khud naari hai. Naatak ke charo kirdaar Deepa Rai, Varsha Pote, Bublee Tondon aur sabse khoobsurat abhinay wala kirdaar Sultana.
                                                Deepa, 11-12 saal ki tedhe-medhe daant waali cute girl, jisne apne maasumiyat bhare abhinay se bilkul dabangg style mein naatak ki shuraat ki, us nanhi si jaan ko uski daadi andheri kothri mein band kar de aur who bechaari darr se tadpati reh yaa fir uski behan ko free railway hospital mein admit kiya gaya,  jahan uski maut ho jaati hai, toh uska jimmedaar kaun?. Agar aap soch rahe ho ki daadi, uske pita, uska bhai, toh main iss baat ko seere se nakaarta hu.  Miss Pratibhaji ne bhi apni speech mein bhi yehi kahan ki ek aurat, ek aurat ke sath aisa kaise kar sakti hai, lekin meri najar mein Deepa aur uski behan ka koi asli gunahgaar tha toh who thi uski maa. Uski maa ne Deepa ke haq mein aawaj nhi uthaayi toh uska khaamiyaza apni badi beti ke maut se bhugatna pada.


                                               Varsha, jisne vyask ladki ka kirdaar nibhaaya hai, who apne chehre
pe acid fenkne ke darr se apni dukaan jaana band kar deti hai toh usme nuksaan kiska, uska khud ka, kyunki kadam piche hataane se ulta dushman ke iraade aur majboot ho jaate hai. Uske kirdaar ke ant mein apne samaj ki sabse kadvi hakeekat batayi gayi, who thi ki middle claas family se acche toh lower class waale hai. Kadvi hai magar sacchi hai, aapne bahut baar dekha hoga ki footpath pe rehne waale parivaar mein jab ek pati apni patni se daaru peeke badatmizi karta hai, toh uska kya hashr hota hai, sare aam sadak pe uski pitaai aur apn middle claas parivaar pati parmeshwar hota hai, woh jaisa kahe tumhe bas vaisa hi karna, unchi aawaj mein baat nhi kar sakte hai vagera vagera. Vasie toh sab log ek hi baat kahte hai ki pati-patni jeevan-rath ke do pahiye, dono ka sath chalna jaruri hai, fir ek pahiye ke sath badsaluki kyun. Ek baat fir bhi mujhe samajh mein nhi aati, kitna kuch sehne ke baad bhi who pahiya rath se alag nhi hota, n jaane kaunsi company ka bana hai.
                                                  Bublee, iss kirdaar ka ek sanvaad main kabhi nhi bhuluga ki  “ladke waalo ko ladki ekdum gharelu-sushil chaahiye means virgin, lekin koi yehi nhi puchta ki aapka ladka gharelu-sushil hai ki nhi”. Shaadi ke baad jo uske sath hota hai uske baare mein aaj ki taarikh mein kisika bhi jyada dhyaan nhi hai, vevaahik balatkaar. Peedhiyo se chale aa rahe iss atyachaar ko mujhe thik se yaad nhi magar shaayad  2011 yaa 2012 mein supreme court ne maana ki patni ke sath jabardasti sambandh balatkaar maana jaayega. Yeh ek aisa dushkarm hai jo wo kisi ko bata bhi nhi sakti aur agar bata bhi de use jawaab milta hai, tere pati toh hai. Pati hua toh kya hua, fir ek patni aur kothe pe baithni waali me fark kya raha. Yehi ki kothe pe baar-baar investment hota hai aur patni pe sirf ek baar.
                                                   Sultana, ek aisi aurat ki kahaani jisse chaar betiya paida hone ke kaaran use ghar se nikaal diya jaata hai, taaki uska pati dusra nikaah kar sake. Pure naatak ka khoobsurat scene agar koi tha toh who yeh ki jab Sultana apni chaar betiyo ke sath sadak kinaare tambu mein rehti hai toh road se gujarne waala har ek aawara shakhs uspe aur uski betiyo pe buri najar daalta hai, toh woh kis tarah saamna karti hai. Uske baad uski jabardasti nikaah ek hakeem se karvaaya jaata jo ek din Sultana ki gair-maujudgi mein uski beti ke sath dushkarm kar deta hai. Naa jaane aur kitna girega insaan. Main har roj subah apne mobile mein dainik bhaskar padta hu, 2-3 khbar toh rishton ko gala ghontne waali hoti hai, jiska koi hal nhi hai. Jab apne hi apno ke apnepan se khel raha hai toh fir,  paraaye…..

Dekh tere sansaar ki haalat..
Kya ho gayi bhagwaan..
Kitna gir gaya insaan..
Hawas mein duba yeh..
Bhul chuka ek naari ka samman..
Usko devi ka darza dekar..
Khud ko bana baitha haivaan..